Entrante 21 di maart 2025 e Maneho di Boet relaciona cu intercambio di informacion financiero obligatorio ta aplicabel
ORANJESTAD – Departamento di Impuesto ta informa cu entrante 21 di maart 2025 e Maneho di Boet relaciona cu intercambio di informacion financiero obligatorio (Boetebeleid bij informatieplicht) a drenta na vigor. E Maneho di Boet aki ta inclui entre otro e procedura ora di impone boetnan, e criterionan cu ta uza pa stipula e suma di boet y ta informa e persona of instituto concerni di su derechonan pa haci obhecion y apelacion contra e boetnan imponi.
E maneho menciona ta wordo implementa di acuerdo cu e ley “Ordenansa nacional pa cu asistencia fiscal internacional” (Landsverordening Internationale Bijstandsverlening Belastingen), en corto LIBB y “Common Reporting Standard”, en corto CRS.
LIBB y CRS
E ley “Ordenansa nacional pa cu asistencia fiscal internacional” ta permiti Aruba pa coopera cu otro paisnan cu e meta pa combati fraude fiscal y preveni evasion di impuesto. E ley aki ta contene stipulacionnan relaciona cu e obligacionnan deriva di tratadonan internacional entre otro “Common Reporting Standard” (CRS) hunto cu Intercambio di Informacion Automatico (Automatic Exchange of Information) (AEOI), cual a wordo determina door di Organisacion pa Cooperacion Economico y Desaroyo (Organisation for Economic Co-operation and Development), en corto OECD.
Obhetivonan
E obhetivonan di e Maneho di Boet pa cu intercambio di informacion financiero obligatorio ta pa defini reglanan cla na momento cu ta impone boet pa incumplimento di debernan fiscal of fraude relaciona cu asistencia fiscal internacional. Alabes e maneho ta sostene e personanan y institutonan local pa cumpli cu nan debernan di acuerdo cu e ley- y regulacionnan di impuesto nacional y internacional. E intencion ta pa motiva nan pa provee informacion corecto y na tempo na autoridadnan fiscal di otro paisnan. Di e forma aki por mitiga e riesgonan di incumplimento.
Na mes momento Departamento di Impuesto ta percura pa eficiencia den su proceso- y controlnan interno pa asina garantisa cu ta aplica e Maneho di Boet den forma husto, coherente y transparente.
Ken ta suheto na LIBB?
E personanan cu ta suheto na e ley LIBB ta:
1. Personanan individual (natuurlijke personen).
2. Personanan huridico (rechtspersonen).
3. Un asociacion di persona cu ta autorisa pa realisa actonan huridico pero cu no tin e status di persona huridico.
4. Otro acuerdo huridico cu ta posee of maneha activo inclui entradanan genera di esaki.
E personanan of institutonan ta wordo apunta por medio di un Decreto Nacional y nan ta por ehempel banconan of otro institutonan financiero cu ta responsabel pa raporta e datonan na autoridadnan fiscal di Aruba y di otro paisnan cu ta cay bou e tratado internacional di intercambio di informacion.
Ki momento ta aplica e Maneho di Boet?
E Maneho di Boet menciona ta aplicabel riba tur persona of instituto cu ta cay bou LIBB (articulo 1) cu no ta cumpli cu e obligacionnan di e ley manera abstene di duna informacion of duna informacion incorecto na autoridadnan fiscal.
Departamento di Impuesto ta recomenda tur persona of instituto financiero cu ta cay bou LIBB pa consulta e Maneho di Boet pa cu intercambio di informacion obligatorio cual ta disponibel riba www.impuesto.aw. Alabes e departamento ta haci un apelacion pa cumpli cu e intercambio di informacion di acuerdo cu nos leynan y e tratadonan internacional pa asina evita e boetnan pa incumplimento.
Gerencia di Departamento di Impuesto
26 di maart 2025