"Stakeholder sessions" di Reforma Fiscal ta continua cu participacion amplio di gremio y comunidad
Despues di evalua e contribucion ricibi durante e prome sesionnan di informacion y participacion cu varios stakeholders, ayera e ekipo di Departamento di Impuesto a tene dos sesion detaya dunando asina oido na e feedback ricibi durante e prome tanda. E ekipo di Departamento di Impuesto lo sigui reuni cu algun gremio y tambe sindicato durante e simannan nos dilanti pa asina por conta cu un participacion amplio durante e trajecto di reforma Fiscal den bienestar general di pais Aruba.
Participacion amplio
Gremionan di diferente sector a participa na e prome tanda di "Stakeholders' Sessions". Aki a presenta e concepto inicial pa introduccion di BTW y otro compensacion riba tereno di inkomstenbelasting, loonbelasting y reparatietoeslag pa mitiga e impacto riba e poder di compra cu e impuesto nobo aki por trece cu ne. Durante e sesionnan aki gremionan por a comparti nan opinion, idea y preocupacion riba e concepto di Reforma Fiscal 2023. Durante e prome tanda, tambe a brinda e oportunidad na gremio pa sinta cu COHO pa expresa nan idea y preocupacionnan encuanto e reforma. Tur contribucion di e sesionnan aki a wordo considera pa por continua cu e desaroyo di e concepto di reforma pa e segunda tanda.
Evaluacion y evolucion di e concepto di Reforma Fiscal
Durante e prome tanda di “Stakeholders' Sessions”, a propone un concepto di BTW di dos (2) tarifa cu ta keda den e cuadro di e necesidad presupuestario di pais Aruba. E concepto aki a consisti di un tarifa minimo di 6% pa cuminda y bibida (cu excepcion di bibidanan alcoholico) y un tarifa maximo di 18% pa tur otro producto y/of servicio. Despues di e prome tanda di sesionnan DIMP a analisa e “feedback” ricibi durante reunionnan, como tambe e cartanan ricibi di gremionan cu propuestanan concreto. E contribucion aki a conduci na varios ehercicio di calculonan cu partners den gobierno di Aruba, COHO y IMF, como tambe expertonan riba tereno fiscal, legal y economico pa asesora e impacto economico y social cu e introduccion di un BTW cu un combinacion di tarifa 6-18% por trece cu ne. Como resultado, a logra evalua e concepto inicial y propone dos otro concepto di BTW cu dos diferente scenario pa loke ta trata e tarifanan.
Desaroyo di un concepto inclusivo y obhetivo
Na e momentonan aki e ley di Reforma Fiscal ta den e fase conceptual y lo wordo finalisa na momento cu un conclusion concreto wordo determina pa Gobierno di Aruba. Durante e di dos tanda di participacion cu gremionan a presenta diferente propuestanan di Reforma Fiscal pa identifica preferencia y opinion. Na su turno lo reuni tambe cu gremionan laboral y social na unda lo ricibi nan contribucion di ideanan y preocupacionnan. Cu participacion di gremionan laboral y social lo continua cu participacion masal di comunidad y evalua e Reforma Fiscal for di e angulo socio-economico, sigurando inclusion y transparencia den tur nivel di nos sociedad.
Departamento di Impuesto ta satisfecho cu e desaroyo inclusivo di e Reforma Fiscal cu ainda ta den su fase conceptual. No obstante e “timeline” ambicioso, e prome tanda di participacion a experencia un retraso minimo di algun siman. E ekipo di Reforma Fiscal kier a gradici tur 141 personanan representando gremio comercial/economico cu a participa den un of mas di e 11 Stakeholders Sessions, como tambe departamentonan di Gobierno, COHO y IMF cu a contribui cu nan experticio durante evaluacion di e prome tanda di reunionnan di participacion. Por conclui cu e Reforma Fiscal ta yegando na e ultimo parti di participacion y inclusion pa asina, cu participacion amplio di gremio y comunidad, por yega na un concepto di Reforma Fiscal den bienestar general di pais Aruba den forma transparente y husto.
Gerencia di Departamento di Impuesto
12 di mei 2022