FAQ | Preguntanan frecuente riba winstbelasting 2020

Preguntanan relaciona cu extension di periodo pa entrega e declaracion di winstbelasting 2020 

  1. Kico e extension di e periodo ta encera?
    E extension di e periodo of termino ta encera cu e contribuyente por entrega su declaracion di winstbelasting mas despues, pero no despues di dia 30 di november 2021. E extension ta valido tambe pa e pago cu e contribuyente mester haci di acuerdo cu su declaracion. Pues, dia 30 di november 2021 ta e ultimo dia pa entrega e declaracion definitivo di winstbelasting 2020 y haci e pago corespondiente. 
     
  2. Pa cua contribuyente e extension ta valido?
    E extension ta valido pa tur contribuyente cu no ta un instituto financiero.
     
  3. Cua contribuyente ta un instituto financiero?
    Un instituto financiero ta un compania cu ta cay bou supervision di Banco Central di Aruba, por ehempel un banco, compania di seguro of oficina di trust. 
     
  4. Un contribuyente cu no ta un instituto financiero por dicidi di entrega su declaracion provisional durante aña 2021?
    Si. E declaracion provisional no ta caduca. Tanten cu e contribuyente no por entrega e declaracion definitivo, e por entrega su declaracion provisional durante aña. Alabes e tin cu haci e pago corespondiente ora e entrega su declaracion provisional. 
     
  5. Un contribuyente cu no ta un instituto financiero por dicidi di no entrega su declaracion provisional y entrega esun definitivo asina cu e tin esaki cla?
    Corecto. E contribuyente aki por dicidi di no entrega e declaracion provisional sino entrega su declaracion definitivo asina cu e tin e cla. Mescos ta conta pa e pago. E contribuyente aki mester tene cuenta cu e declaracion definitivo y e pago no por drenta despues di dia 30 di november 2021. 
     
  6. Un instituto financiero por entrega su declaracion y haci pago despues di dia 31 di mei 2021?
    No. Un contribuyente cu ta un instituto financiero tin cu entrega su declaracion y haci pago di winstbelasting no mas laat cu dia 31 di mei 2021. Den caso cu e contribuyente aki no ta alcansa pa entrega su declaracion definitivo pa dia 31 di mei 2021, e ora e mester entrega su declaracion provisional di aña 2020 pa e fecha aki. Mescos ta conta pa e pago corespondiente cu e mester haci.