Informacion encuanto plachi di number 2025

Pa aña 2025 tur automobilista y motociclista lo ricibi e plachinan di number nobo pa nan vehiculo di motor. E plachinan ta valido pa un periodo di 5 aña, pues te cu aña 2029. Pa por ricibi e plachinan nobo, mester paga e impuesto di vehiculo di motor di aña 2025 y e seguro mester ta valido. 

Riba e pagina aki por haya mas informacion encuanto e proceso pa busca e plachinan di number. Please lesa e informacion cu hopi atencion.

Impuesto 2025 mester ta paga

Pa por ricibi e plachinan nobo, e impuesto di vehiculo di motor di aña 2025 mester ta paga sea pa mita aña of ful aña. E tarifa di impuesto no a cambia pa aña 2025. Ora di haci pago di impuesto 2025, mester inclui e suma di Afl. 14 florin pa e gastonan di plachi di number. Pa brommer e suma ta Afl. 10. 
 

Pago via banco

Departamento di Impuesto ta recomenda pa haci pago online via banco. Tene cuenta, cu si acaso tin debe atrasa di impuesto di vehiculo di motor, lo registra e pago aki riba e debe atrasa prome. Mester elimina e debe bieu prome. Si acaso resta un suma, lo registra e suma aki riba e impuesto di aña 2025. 
 

Mas informacion

Recibo di pago

  • Mester upload e recibo di pago di Departamento di Impuesto ora di haci un cita. Pa cada plachi di number ta upload un recibo. 
  • Si a paga poco poco (deelbetaling), e ora ta upload e ultimo recibo di pago. Pues no tin mester di upload tur e recibonan di e pago parcial. 
  • Si a haci pago online via banco y no a haya e recibo di pago di Departamento di Impuesto, mester upload e comprobante di pago di banco ora di haci e cita. E personanan cu no tin un recibo di Departamento di Impuesto, lo ricibi nan recibo ora di busca e plachinan di number. 
Debe atrasa

No ta posibel pa paga impuesto di aña 2025, si tin debe atrasa. Debe atrasa ta debe di impuesto di vehiculo di motor di aña 2024, 2023 of mas bieu. Si acaso tin debe atrasa, mester paga esaki completamente, prome cu por paga e impuesto di aña 2025. 

Areglo di pago no ta posibel

Na e momentonan aki, no ta posibel mas pa haya un areglo di pago riba debe atrasa di impuesto di vehiculo di motor. 

Seguro valido

Ley ta stipula cu na momento cu ta otorga e plachinan di number, e seguro di e vehiculo mester ta valido. Esaki ta conta pa tur vehiculo di motor manera auto, truck, bus y brommer. 

Si e seguro no ta valido riba e fecha cu ta busca e plachinan di number, no ta posibel pa haya e plachinan. 

Kico mester haci?

  1. Paga e seguro, si acaso e no ta paga.
  2. Scan e polisa di seguro of saca un potret cla di dje. E polisa ta indica e datonan di e doño di vehiculo, e detayenan di e vehiculo y e fecha di valides. 
  3. Warda e polisa digital den bo computer of telefon. Mester di dje ora di haci un cita online. 

Tin compania di seguro cu ta otorga e polisa den forma digital (via mail). Den e caso aki por uza e file digital cu e compania di seguro a duna. 

Vergunning

E personanan of companianan cu tin plachi di number di categoria TX, B, V, T, O, MFV of V mester mustra e vergunning di gobierno original na momento di busca e plachi di number. Esaki ta un carchi licht geel. 

Atencion

  • No por upload un scan of potret di e vergunning den e sistema di afspraak. 
Mester haci un cita

Debi cu e cantidad di clientenan ta grandi, lo parti e plachinan di number unicamente via un cita. Si un persona acudi na Departamento di Impuesto sin su cita, no por brind'e servicio y e lo no por ricibi su plachinan di number e momento ey. E personal di Departamento di Impuesto por duna guia y ayudo pa haci e cita. 

Sistema automatisa

E sistema di cita ta online y automatisa y pa e motibo aki ta necesario pa tur persona cu ta haci un cita, tin un e-mailadres. E sistema ta genera un mail di confirmacion y e recordatorionan. Pa e motibo aki ta importante pa yena e e-mailadres corectamente. Si no tin un e-mailadres, por check cu un persona di confiansa si por uza su e-mail. 

Prome cu haci un cita

Prome cu haci un cita mester haci un scan of saca un potret cla di e siguiente documentonan:

  1. E polisa di seguro. 
  2. E comprobante di pago (recibo) cu a ricibi di Departamento di Impuesto.
  3. E comprobante di pago di banco, solamente si no a ricibi e recibo di Departamento di Impuesto. 

Atencion

  • Ora di saca un potret di un documento, please no saca e potret di banda. E camera mester ta posiciona di tal forma pa haya un potret di un angulo straight.
  • No tin mester di upload e recibo di banco si ya a ricibi e recibo di Departamento di Impuesto via e-mail. Den e caso aki mester uza e recibo di Departamento di Impuesto. 

E filenan digital ta importante pasobra mester upload nan ora di haci e cita.

Con pa haci un cita?

  1. Pa haci un cita, click riba e link aki:

Haci cita

  1. Bay na Private of Business
  2. Click Book y scoge e orario desea.
  3. Yena tur e datonan y pa cada plachi di number, upload e documentonan rekeri (seguro di auto, e comprobante di pago cu a ricibi di Departamento di Impuesto of e comprobante di pago di banco) .

Please controla e datonan prome cu click Submit.

Ta sumamente importante pa controla e datonan cu bo a yena. Controla tambe si bo a upload tur comprobante di pago y seguro pa cada plachi di number. Despues di controla tur cos, por click Submit. Si a yena nomber of e-mailadres robes, lo mester cancela e cita y boek un cita nobo. 
 

Riba dia di e cita

Riba dia di e cita, mester:

  1. Acudi na e personal di seguridad.
  2. Mustra bo confirmacion di cita den bo telefon. 
  3. Mustra bo identificacion (rijbewijs, cedula of paspoort). Bo ID mester ta valido.
  4. Bo lo ricibi bo number. 
  5. Sigui instruccion di e personal di seguridad. 

Atencion

  • E personal di seguridad lo controla si Bo ta autorisa pa busca e plachinan. Sin un identificacion valido, Bo no por ricibi bo plachinan di number. 
  • No tin mester di trece papel di seguro, comprobante di pago of comprobante di registracion di vehiculo. Esaki no ta conta pa e pensionadonan cu tin cita mainta entre 8 or y 9 or. E pensionadonan aki si mester trece e papelnan di seguro y comprobante di pago. 
  • Mester trece e vergunning di gobierno (carchi licht geel) original pa plachinan di number di categoria TX, B, V, T, O, MFV of V.

3 Grupo

Tin 3 grupo esta:

  1. personanan priva, 

  2. companianan

  3. pensionadonan y 

Pa cada grupo tin un otro proceso. Siguientemente por consulta e informacion cu ta valido pa bo persona. 

Mi ta un persona priva

Persona priva ta tur persona y comerciante cu tin un empresa propio (eenmanszaak). E citanan pa personanan priva ta sosode durante dia di dialuna te cu diabierna. 

Busca 5!

Cada persona por busca te cu 5 plachi di number. Departamento di Impuesto ta prefera pa Bo busca e plachinan di 5 vehiculo den un solo biaha. Por busca e plachinan di bo mes, bo famia of amistad (mama, tata, ruman, casa, yiu, amigo) tambe. Si Bo ta busca plach’i number pa un otro persona, Bo no mester di un carta di apoderacion (machtigingsbrief). Si Bo tin mas cu 5 vehiculo, mester boek mas cita. 

Tene cuenta cu pa cada plach’i number, mester tin e polisa di seguro y e comprobante di pago den forma digital. 


Bo nomber ta importante

Si Bo a yena bo nomber ora di boek e cita, e ora Bo ta e unico persona autorisa cu por busca e plachinan di number. Ta importante pa e nomber cu Bo a yena ora di haci cita ta cuadra cu bo paspoort, rijbewijs of cedula.

Por ehempel

Si señora Maria a yena su nomber ora di haci e cita, e no por laga señora Dora busca e plachinan p’e. Si señora Maria ta desea di laga señora Dora busca e plachinan, e ora señora Maria mester cancela e cita y laga señora Dora boek un cita nobo.  

Confirmacion di cita

Inmediatamente despues di boek e cita, Bo lo ricibi un mail cu ta confirma cu bo cita a keda registra. P’esey ta importante pa yena e e-mailadres corectamente ora di haci e cita. Ta consehabel pa controla bo junk mail tambe pa e mail di confirmacion. Si no a ricibi un mail, esey ta nifica cu no a yena e e-mailadres corectamente. Den e caso aki mester cancela e cita y boek un cita nobo. 

Cancela of cambia e cita

Despues di boek e cita, por cancela esaki of cambie pa un otro fecha via e mesun mail di confirmacion cu Bo a ricibi. No ta posibel pa cancela of cambia fecha den menos di 24 ora prome cu e cita. 

Recordatorio

Bo lo ricibi 2 mail di recordatorio. E prome recordatorio, Bo lo ricibi 3 dia prome cu bo cita. E di dos recordatorio, Bo lo ricibi riba dia di e cita. 

Encuesta

E dia despues di bo cita, Bo lo ricibi un mail encuanto un encuesta tocante e servicio cu Bo a experencia ora di busca e plachinan di number. E encuesta ta anonimo y hopi cortico. Bo lo ta cla cu ne den menos di 5 minuut. 

Departamento di Impuesto ta encurasha Bo pa participa na e encuesta aki, pa asina por evalua bo experiencia pa cu e servicio brinda.  

Mi tin un compania

Compania (Business) ta tur entidad (NV, Stichting, VBA etc) cu no ta eenmanszaak. E citanan pa companianan ta sosode tur diasabra durante dia.  

Busca 25!

Cada compania por busca te cu 25 plachi di number. Departamento di Impuesto ta prefera pa busca e plachinan di 25 vehiculo den un solo biaha. Por busca e plachinan di bo mes compania y e empleadonan di bo compania. Si ta busca plach’i number pa otro persona of compania, no mester di un carta di apoderacion (machtigingsbrief). Si bo compania tin mas cu 25 vehiculo, mester boek mas cita. 

Tene cuenta cu pa cada plach’i number, mester tin e polisa di seguro den forma digital.


Bo nomber ta importante

E persona cu ta representa bo compania, ta boek e cita na su nomber (no na nomber di bo compania). E persona ey ta e unico persona autorisa cu por busca e plachinan di number. Riba dia di e cita, e personal di seguridad lo controla ora cu bin busca e plachinan. E persona mester trece su paspoort, rijbewijs of cedula (esaki mester ta valido) pa identifica su mes. Ta importante pa e nomber cu Bo a yena ora di haci cita ta cuadra cu bo paspoort, rijbewijs of cedula.

Por ehempel

Si compania X ta laga persona A busca e plachinan, e ora mester boek e cita na nomber di persona A. Si acaso tin cambio di persona mester cancela e cita y boek un cita nobo.  

Confirmacion di cita

Inmediatamente despues di boek e cita, Bo lo ricibi un mail cu ta confirma cu bo cita a keda registra. P’esey ta importante pa yena e e-mailadres corectamente ora di haci e cita. Ta consehabel pa controla bo junk mail tambe pa e mail di confirmacion. Si no a ricibi un mail, esey ta nifica cu no a yena e e-mailadres corectamente. Den e caso aki mester cancela e cita y boek un cita nobo. 

Cancela of cambia e cita

Despues di boek e cita, por cancela esaki of cambie pa un otro fecha via e mesun mail di confirmacion cu Bo a ricibi. No ta posibel pa cancela of cambia fecha den menos di 24 ora prome cu e cita. 

Recordatorio

Bo lo ricibi 2 mail di recordatorio. E prome recordatorio, Bo lo ricibi 3 dia prome cu bo cita. E di dos recordatorio, Bo lo ricibi riba dia di e cita. 

Encuesta

E dia despues di bo cita, Bo lo ricibi un mail encuanto un encuesta tocante e servicio cu Bo a experencia ora di busca e plachinan di number. E encuesta ta anonimo y hopi cortico. Bo lo ta cla cu ne den menos di 5 minuut. 

Departamento di Impuesto ta encurasha Bo pa participa na e encuesta aki, pa asina por evalua bo experiencia pa cu e servicio brinda.  

Mi ta un pensionado

Pensionado ta tur persona priva di edad 65+ y cu kisas tin un empresa propio (eenmanszaak). E citanan pa pensionado ta sosode durante dia, di dialuna te cu diabierna. E orario di cita ta 8:00 - 9:00 di mainta. Pa boek e cita pa pensionado mester yama of pasa personalmente na oficina principal na Camacuri. 

Pensionadonan por scoge tambe pa boek un cita como Persona priva. Den e caso aki, por busca maximo 5 plachi di number y e proceso ta diferente. Lesa de detayenan na e parti Mi ta un persona priva.

Busca 2!

Cada pensionado por busca te cu 2 plachi di number. Departamento di Impuesto ta prefera pa busca e plachinan di 2 vehiculo den un solo biaha. Por busca e plachinan di bo mes, bo famia of amistad (casa, yiu of amigo) tambe. Si Bo ta busca plach’i number pa un otro persona, Bo no mester di un carta di apoderacion (machtigingsbrief).
 

Mester un cita

Como pensionado, bo mes no por boek e cita debi cu e citanan pa pensionado ta wordo atendi durante un orario special. E personal di Departamento di Impuesto ta boek e cita pa bo persona sea via telefon of personalmente na su oficina na Camacuri. Si ta via telefon, mester yama Departamento di Impuesto na 522 7423 of 522 7424. 

Departamento di Impuesto lo trata na duna bo e cita pa e mesun dia of mas lihe posibel. Ora di busca e plachinan di number mester trece e papelnan di seguro y e comprobante di pago di cada plachi di number. 


Bo nomber ta importante

Si Bo a duna bo nomber pa boek e cita, e ora Bo ta e unico persona autorisa cu por busca e plachinan di number. Riba dia di e cita, e personal di seguridad lo controla ora Bo bin busca e plachinan. Bo mester trece bo paspoort, rijbewijs of cedula (esaki mester ta valido) pa identifica bo mes. Ta importante pa e nomber cu Bo a duna ora di haci cita ta cuadra cu bo paspoort, rijbewijs of cedula.

Si Bo mes no ta alcansa pa busca e plachinan, e ora mester yama Departamento di Impuesto pa boek un otro cita. Mescos ta conta si mester cancela e cita of cambie pa otro fecha. 

Departamento di Impuesto ta pidi cooperacion di tur contribuyente automobilista y motociclista pa asina e proceso ora di busca plachi di number por cana bon y rapido.