Haci declaracion mensual via “BO impuesto” ta obligatorio
Lo no otorga e formularionan di declaracion mensual den forma di papel mas
ORANJESTAD – Manera conoci, tur contribuyente por haci nan declaracion mensual di BBO/BAVP/BAZV, loonbelasting, speelvergunningsrecht, toeristenheffing, BBV, BBVAM den un forma digital pa medio di e portal “BO impuesto” (of BOi). Departamento di Impuesto recientemente a habri tambe e oportunidad na su contribuyentenan pa entrega y manda e lista colectivo di salario (VZL) y/of e lista colectivo di pago na tercera persona (VOD) den forma digital pa medio e portal menciona.
Declaracion den forma di papel no ta posibel mas
Departamento di Impuesto ta recorda tur contribuyente cu pa e luna di juni 2020 ainda por a entrega e formularionan di declaracion den forma di papel. Sinembargo pa e luna di juli 2020 en adelante por haci declaracion mensual di impuesto unicamente den forma digital. E fecha final pa haci declaracion di juli 2020 ta 17 di augustus 2020.
Pa e impuestonan mensual, Departamento di Impuesto lo no otorga e formularionan di declaracion den forma di papel mas. P’esey ta importante pa haci un cita y registra tur compania pa haya acceso na “BO impuesto”.
Declaracion digital ta obligatorio
E contribuyentenan cu ainda no a registra nan mes pa por tin acceso na “BO impuesto”, a ricibi recientemente un invitacion oficial di Departamento di Impuesto via e-mail of carta pa nan registra mas pronto posibel, pa asina di awor en adelante nan por sigui cumpli na tempo cu e obligacion di haci declaracion di impuesto.
Departamento di Impuesto ta recorda su contribuyentenan comercial, cu declaracion di impuesto den forma digital ta obligatorio y mester considera e invitacion pa registracion uno oficial segun articulo 6 di nos Ordenanza nacional general di impuesto.
Hopi a registra caba
Actualmente tin 6.376 contribuyente comercial cu ta haci uzo di e servicionan digital di “BO impuesto” y nan ta sumamente satisfecho cu paramento den rij pa entrega declaracion di impuesto a pasa definitivamente pa pasado. E cantidad di usuarionan di “BO impuesto” a aumenta den luna di juni cu 1.666 contribuyente y actualmente tin un total di 117 asesor fiscal registra den e portal “BO impuesto”. Keda sin cumpli cu e obligacion di haci declaracion por conduci eventualmente na imponemento di cobransa adicional (naheffingsaanslag), inclui boet pa incumplimento of investigacion di e negoshi.
Gerencia di Departamento di Impuesto
15 di juli 2020