E siman aki por busca e pakete di winstbelasting 2018 na Departamento di Impuesto
E pakete ta contene e formularionan di declaracion di impuesto di ganashi
ORANJESTAD – E siman aki – di 1 te cu 5 di april - e clientenan di winstbelasting por pasa busca nan pakete di winstbelasting na Departamento di Impuesto. E paketenan ta contene e formularionan di declaracion di aña 2018, esta un formulario di declaracion provisional (voorlopige aangifte) y un formulario di declaracion definitivo (definitieve aangifte). Departamento di Impuesto lo otorga e paketenan solamente den e periodo di 1 te cu 5 di april. Despues di e fecha aki lo manda e paketenan via post.
Na unda por busca e pakete?
Por busca e pakete na e edificio anexo di Departamento di Impuesto na Camacuri (drenta na porta number 4). E orario di servicio ta: 8:00 am – 4:00 pm non-stop.
Ta recomendabel pa trece e comprobante di registro di Camara di Comercio y e persoonsnummer di e empresa pa asina e proceso di otorgamento por bay mas lihe.
E conseheronan cu a manda nan lista di cliente lo wordo avisa via e-mail ki dia por pasa busca e paketenan di nan clientenan.
Gerencia di Departamento di Impuesto
4 di april 2019