Dia 31 di maart 2023 ta e fecha final pa entrega e ‘verzamelloonstaat’ y ‘verzamelstaat opgaaf derden’ di aña 2022
E fecha aki lo keda valido tur aña
ORANJESTAD – Departamento di Impuesto ta participa cu e fecha final pa entrega e lista colectivo di salario (verzamelloonstaat of VZL) y e lista colectivo di pago na tercera persona (verzamelstaat opgaaf derden of VOD) di aña 2022 ta 31 di maart 2023. Esaki ta di acuerdo cu e cambio recientemente den ley di e “Plan di Impuesto 2023” cu a keda aproba na december ultimo. Pues di awor padilanti, tur aña dia 31 di maart ta e fecha final pa entrega e documentonan menciona.
Tur doño di trabou of comerciante mester entrega e listanan menciona den forma digital via e portal ‘BO impuesto’ di Departamento di Impuesto. Si un doño di trabou of comerciante no ta registra den e portal menciona, lo mester haci esaki mas lihe posibel. Pa registra como usuario di e portal mester haci un cita via: https://www.impuesto.aw/afspraak_maken_met_DIMP
Departamento di Impuesto ta conseha tur contribuyente pa cumpli na tempo debi cu no ta bay tin prolongacion di termino. Keda sin entrega e ‘Verzamelloonstaat’ of e ‘Verzamelstaat opgaaf derden’ di aña 2022 lo por nifica cu e contribuyente lo por ricibi un cobransa adicional (naheffingsaanslag) inclui boet di Afl. 10.000 maximo.
Pa mas informacion tocante verzamelloonstaat y/of verzamelstaat opgaaf derden por consulta e website www.impuesto.aw via e siguiente linknan:
https://www.impuesto.aw/verzamelloonstaat-vzl/
https://www.impuesto.aw/verzamelstaat-opgaaf-derden-vod
Gerencia di Departamento di Impuesto
16 di januari 2023