Dia 3 di october ta ultimo dia pa entrega e declaracion di inkomstenbelasting 2021
Prolongacion di termino ta posibel
ORANJESTAD – Relaciona cu e declaracion di inkomstenbelasting 2021, Departamento di Impuesto tin e siguiente participacion.
Fecha oficial di otorgamento
E fecha oficial di otorgamento di e formulario di declaracion di inkomstenbelasting 2021 ta 2 di augustus 2022. Conforme ley, e contribuyente tin dos luna pa yena y entrega su declaracion. E fecha final pa entrega e declaracion ta 3 di october 2022.
Prolongacion di termino
Prolongacion di termino ta posibel unicamente pa contribuyentenan cu a ricibi un formulario cu fecha di otorgacion 2 di augustus 2022. Si un contribuyente no alcansa pa entrega su declaracion pa dia 3 di october 2022, automaticamente e lo haya 2 luna mas di tempo. Pues no ta necesario pa entrega un peticion por escrito. Den caso di prolongacion, e fecha final ta bira 5 di december 2022. Pues e contribuyentenan ta haya un total di 4 luna di tempo pa entrega su declaracion. Despues di dia 5 di december 2022 lo no duna mas prolongacion di termino. Contribuyentenan cu a haya un formulario cu un fecha di otorgacion diferente no lo haya termino di prolongacion. Den e caso aki e termino di entrega ta vence 2 luna despues di e fecha di otorgacion.
Saca copia
Ta recomendabel pa saca copia di e declaracion y trece esaki tambe pa por stempel e na momento di entrega esun original. Asina e contribuyente lo keda cu su prueba di entregamento.
Ta importante pa entrega e declaracion
Ta importante pa cumpli cu e entregamento di e declaracion. Cu e declaracion e contribuyente ta haci uzo di su derecho door di declara na inspector di impuesto kico exactamente el a ricibi na entrada y cuanto su gastonan tawata. Si no entrega e declaracion, inspector lo impone un cobransa taxativo. Esaki ta nifica cu inspector mes lo calcula e entrada fiscal pa e contribuyente. Alabes e contribuyente lo por haya un boet di 5% di e suma di inkomstenbelasting. E boet ta minimo Afl. 250 y maximo Afl. 10.000,-.
Guia aclaratorio (Toelichting)
Contribuyentenan por yena e formulario di declaracion di inkomstenbelasting 2021 haciendo uzo di nos toelichting riba nos website. E toelichting ta un guia pa yena e formulario di un manera mas corecto y completo.
Toelichting aangifte inkomstenbelasting 2021 (verkorte versie) | Departamento di Impuesto
Gerencia di Departamento di Impuesto
27 di september 2022