Dia 18 di november ta start cu e campaña pa yena e formulario di declaracion di inkomstenbelasting 2018
Probecha di e oportunidad unico aki
ORANJESTAD – Departamento di Impuesto ta informa su contribuyentenan, cu dia 18 di november proximo lo start cu e campaña pa yena e formulario di declaracion di inkomstenbelasting 2018. E contribuyentenan cu tin dificultad pa yena e formulario di declaración aki por acudi libremente na un di e sitionan unda e personal di Departamento di Impuesto lo ta cla pa brinda ayudo. E campaña aki tin un duracion di 2 siman y no tin mester di haci un cita.
Kendenan por participa?
- Tur persona soltero cu tin un entrada bruto di no mas cu Afl. 75.000.
- Tur persona casa cu – hunto - tin un entrada bruto di no mas cu Afl. 150.000.
Ta importante pa tene na cuenta cu no por brinda ayudo na esnan cu tin un empresa propio of cu ta traha riba nan mes.
Na unda lo brinda ayudo?
| Fecha | Lugar | Orario |
|---|---|---|
| 18-22 November 2019 | YMCA San Nicolas | 8:00am - 4:00pm non-stop |
| 25-28 November 2019 | Bibliotheca Nacional Oranjestad | 8:00am - 4:00pm non-stop |
Trece documento
Departamento di Impuesto ta pidi su contribuyentenan pa trece e formulario di declaracion di aña 2018 hunto cu tur comprobante necesario relaciona cu entrada y gasto, tanto na Aruba como den exterior. Alabes ta importante pa duna e datonan personal di pareha casa y e yiunan. Despues cu caba di yena e declaracion, por entrega esaki mesora y lo ricibi un comprobante.
E contribuyentenan cu nan mes a yena e declaracion, por pasa entrega esaki durante e dianan di ayudo sea na YMCA San Nicolas of Biblioteca Nacional na Oranjestad.
E ultimo dia pa entrega e declaracion di inkomstenbelasting 2018 ta 9 di december 2019. Tene na cuenta cu despues di e fecha aki no lo tin mas extension.
Por sigui e pagina di Facebook di Departamento di Impuesto pa keda bon informa na tur momento.
Gerencia di Departamento di Impuesto
15 November 2019