Departamento di Impuesto ta inicia trayecto di reforma fiscal segun e acuerdonan stipula den “Landspakket”
![](https://cuatro.sim-cdn.nl/impuesto/uploads/styles/large_5x1_2560x512/media/tax-reform-2_1.png?h=273765a6&cb=aW7E_2Yb)
Subrayando e importancia di e aporte di henter comunidad
ORANJESTAD – Un sistema di impuesto husto, practico, eficiente y sostenibel ta e meta tras di e acuerdonan stipula den e Pakete Nacional, e asina yama “Landspakket”, pa loke ta e implementacion di un reforma fiscal. A base di e recomendacionnan di e expertonan riba tereno di impuesto, tanto local como internacional, a keda acorda cu Hulanda cu Aruba lo adopta un sistema di BTW (belasting over de toegevoegde waarde) yama tambe “VAT” (value added tax).
Cu finalizacion di e acuerdo bilateral aki, Gobierno di Aruba a duna Departamento di Impuesto e mandato oficial pa inicia e trayecto di “Reforma Fiscal Aruba”, na unda participacion di gremionan tanto di sector priva como di sector publico, y di henter nos comunidad ta esencial pa cu su ehecucion.
Cumplimento structural
Pais Aruba, cu apoyo y guia di organisacionnan internacional manera IMF (International Monetary Fund) y OECD (Organisation for Economic Co-operation and Development), a determina e fundeshi legislativo di e sistema di BTW, cu Pais Aruba lo mester atene na dje. Cu e aporte di gremionan y demas expertonan den nos comunidad, e fundeshi aki lo ta e punto di salida pa determina e ehecucion di e reformanan segun e cuadronan di e legislacion y e acuerdonan stipula den e Pakete Nacional.
Inicio di trayecto reforma fiscal
Aruba a ricibi a consecuencia di e impacto financiero di e pandemia di COVID-19, sosten di likides di Hulanda y a palabra en conexion cu esaki cu varios reforma, entre otro e reforma fiscal, lo mester tuma lugar den e añanan nos dilanti. E structura global a keda estableci den e Pakete Nacional. Basa riba e acuerdo finaliza y e structura di BTW aproba pa COHO y Gobierno di Aruba, Departamento di Impuesto lo desplega e siman aki e proceso di ehecucion di e reforma di nos leynan di impuesto. Pa cu esaki, entre dianan 22 di februari y 4 di maart 2022, gremionan lo tin e oportunidad pa atende diferente “Stakeholders Meetings”, durante cual lo duna informacion riba e trayectoria cu a conduci na reforma fiscal, e trayectoria cu lo sigui y e importancia di e aporte di gremio y comunidad en general.
Un reforma historico
E ekipo di Departamento di Impuesto ta honra di por lidera e trayecto di e reforma fiscal aki den tur su facetanan. Hecho ta cu Departamento di impuesto a bin ta trahando pa mas cu un aña caba cu Gobierno di Aruba y Hulanda prome cu por a yega na acorda e prome reforma di impuesto aki. Reforma Fiscal Aruba ta uno historico y diferente pa Aruba y lo yuda determina e rumbo di bienestar general di henter nos nacion, tanto pa e actual generacion como e futuro generacionnan.
Departamento di Impuesto lo mantene e comunidad di Aruba informa di e desaroyonan den e proximo dianan, pa asina un y tur por adkiri mas conocemento di e materia y asina aporta constructivamente tambe na e proyecto “Reforma Fiscal Aruba”.
Gerencia di Departamento di Impuesto
14 di februari 2022