Cualkier plach’i number di auto oranje cu blanco cu automobilista mes a traha no ta valido

ORANJESTAD – A yega na conocemento di Departamento di Impuesto cu tin auto riba nos careteranan cu plachi di number oranje cu blanco cu no ta esunnan oficial cu a wordo otorga door di Departamento di Impuesto. Riba esaki ta informa publico en general cu ningun persona ta permiti pa traha plachi di number riba nan mes. Te cu aña 2018 Departamento di Impuesto tawata duna un carta di permiso pa e automobilista traha su mes plachinan ora esakinan no tawata den stock. Pero entrante 2019 esaki no ta e caso mas. Tur vehiculo di motor cu ta haci uzo di nos careteranan mester tin e plachinan cu Departamento di Impuesto a otorga.  

E automobilistanan cu a pone plachi di number oranje cu blanco sea den forma di sticker, papel, carton etc. riba nan vehiculo ta cometiendo un acto ilegal y inhusto enfrente di esnan cu si ta cumpli cu pago di nan impuesto. Departamento di Impuesto a pone Cuerpo di Polis tambe na altura y ta pidi comunidad en general pa informa polis ora mira un vehiculo riba caminda cu plachi di number falsifica. Asina so por yuda caba cu e tipo di actonan aki cu no ta contribui na bienestar di nos pais.