Cobransa di grondbelasting 2019 a sali
Fecha di cobransa ta 31 di mei 2019
ORANJESTAD – Departamento di Impuesto ta participa cu e cobransa di grondbelasting di aña 2019 a sali. E cobransa tin fecha di 31 di mei 2019 y den e dianan venidero e clientenan lo ricibi e cobransa via post.
Ley ta duna un cliente e option pa por paga su grondbelasting den un solo biaha of den termino. Departamento di Impuesto ta conseha tur cliente pa lesa e texto imprimi riba e cobransa cu hopi atencion pa cu e terminonan di pago.
No a ricibi cobransa?
Pa dia 31 di mei 2019 tur cliente mester a ricibi nan cobransa. Si esaki no a sosode, mester acudi mas pronto posibel na oficina principal y pidi un duplicado. E persona cu ta pidi e duplicado mester identifica su mes sea cu cedula, paspoort of rijbewijs valido
Termino di pago
Aki ta sigui un skema di e terminonan di pago manera stipula pa ley:
|
Grondbelasting 2019 fecha 31 di mei 2019 | ||
|
Termino di pago |
Fecha final pa haci pago |
Suma di pago rekeri segun ley |
|
E prome 2 terminonan di pago |
1 di juli 2019 |
50% di e suma di cobransa pa cubri e prome y di dos kwartaal (jan – maart y april – juni). |
|
Di tres termino di pago |
30 di september 2019 |
25% di e suma di cobransa pa cubri e di tres kwartaal (juli – sept). |
|
Di cuater termino (ultimo termino) |
3 di januari 2020 |
25% di e suma di cobransa pa cubri e ultimo kwartaal (oktober – december). |
|
Pa dia 3 di januari 2020 e cobransa di aña 2019 mester ta completamente paga. |
Haci pago
Por haci pago na Departamento di Impuesto mes, na un oficina di gobierno den districto of via banco. Pa e clientenan cu ta paga via banco, ta sumamente importante pa ora di haci e pago pa nan menciona e number di e cobransa menciona riba e cobransa. Pa e descripcion ta completo, ta bon pa pone acerca cu ta trata di ‘Grondbelasting 2019’ y menciona e persoonsnummer cu ta aparece riba e cobransa. Di e forma aki Departamento di Impuesto por procesa e pagonan corectamente.
Areglo di pago
E cliente cu no por paga su cobransa di acuerdo cu e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu Departamento di Impuesto ta continua cu e proceso di cobramento cu gradualmente por bira mas severo, locual por nifica tambe gasto extra pa e cliente. Pa e areglo di pago mester pasa na seccion Servicio na cliente na Camacuri of haci un cita cu un funcionario encarga cu cobramento.
Mas informacion
Pa mas informacion tocante e cobransa por acudi na Departamento di Impuesto y pidi un cita cu un funcionario di grondbelasting. Pa e cita ta importante pa e cliente bin cu su cobransa, un taxatierapport (no mas bieu cu 3 aña) of e mapa cu a wordo entrega na DOW, polisa di seguro di candela y e acta di notario.
Gerencia di Departamento di Impuesto
23 di mei 2019