BBO na frontera

Entrante 1 di augustus 2023 a ahusta e diseño di e ley di "Belasting over bedrijfsomzetten en belasting additionele voorzieningen projecten" (BBO/BAVP) y "Bestemmingsheffing AZV" (BAZV). E cambio di ley mas importante ta encera e introduccion di cobransa di BBO na frontera. Cobransa di impuesto na frontera no ta un concepto nobo; solamente a haci algun cambio den e diseño di e leynan existente di BBO/BAVP y BAZV.

Tanto Departamento di Impuesto (DIMP) como Departamento di Aduana (DAA) ta responsabel pa e ehecucion di e cambionan di ley y ta traha den colaboracion estrecho cu otro, pa asina por percura pa un bon supervision y ehecucion di e leynan menciona.

Ta importante pa comunidad en general, specialmente e comerciantenan, ta na altura di e cambionan y e procesonan nobo cu e cambionan di ley ta trece cu nan.

E contenido riba e pagina aki ta wordo ofreci pa metanan informativo y por wordo actualisa na tur momento. No por adkiri derecho riba e contenido. 

Links

BBO, BAVP y BAZV tin e mesun base pa calcula y cobra e impuesto. Pa motibonan practico, siguientemente ta referi na BBO, BAVP y BAZV cu e abreviacion “BBO”. 

Na ki momento ta surgi e obligacion di paga BBO?

E obligacion di paga BBO ta surgi ora cu importa producto na Aruba. Esaki ta loke nos ta yama cobransa di “BBO na frontera”.

Alabes ley ta stipula cu un comerciante tin e obligacion di paga BBO tambe ora e bende su producto of servicio. Esakinan ta e dos “belastbare feiten” cu ta causa e obligacion di pago di BBO.

E tarifa di BBO

Entrante 1 di januari 2023 e tarifa combina di BBO/BAVP y BAZV ta total 7%. E reparticion di e tarifanan di BBO/BAVP y BAZV ta como lo siguiente:
- BBO:  2,5%
- BAVP: 1,5%
- BAZV: 3%

Departamento di Aduana lo cobra 4% di BBO/BAVP y 3% di BAZV (total 7%) ora cu importa producto na Aruba.

Ken ta paga BBO na frontera?

Tur persona of compania ta paga BBO na frontera na momento cu importa producto na Aruba. Un importador por ta un persona priva, comerciante, fundacion of otro organisacion. 

Un importador ta paga BBO hunto cu invoerrechten (y accijns) ora e haci declaracion di aduana. 

Broker

Normalmente un importador ta acerca un “broker” ora cu e ta importa producto. E broker ta encarga cu e declaracion di aduana y ta haci tur e tramitenan pa su clientenan y na final e broker ta haci e pago corespondiente na Departamento di Aduana. Tin companianan importador cu nan mes ta prepara e documentonan y haci e declaracion na aduana. 

Ora cu importa producto, e importador of broker ta entrega e declaracion na Departamento di Aduana. 

Persoonsnummer di importador

Un importador mester tin su persoonsnummer. Riba e declaracion, e broker mester indica kende ta e importador y cua ta su persoonsnummer. Esaki ta sumamente importante, specialmente pa e comerciantenan cu tin e derecho di deduccion di e BBO paga na frontera. Esnan cu ainda no tin persoonsnummer por pidi esaki. 

Dispensacion di BBO na frontera

Un importador cu tin dispensacion (vrijstelling) di invoerrechten of accijns a base di e ley “Landsverordening in-, uit- en doorvoer (LIUD), tambe ta haya dispensacion di BBO na frontera. E importador aki no ta paga BBO na frontera.

Douanewaarde ta e base pa paga BBO na frontera

Departamento di Aduana ta cobra BBO y invoerrechten y/of accijns riba e balor di producto manera stipula door di aduana, esta riba e “douanewaarde”. Pues, e douanewaarde ta e base di cobransa y pago di BBO na frontera. E sistema cu ta calcula e douanewaarde a keda mescos. 

Unabes cu stipula e douanewaarde, ta hinca e datonan den e sistema digital di aduana cu yama "ASYCUDAWorld" y automaticamente e sistema aki ta calcula loke e importador mester paga. No tin gasto administrativo cu ta bin acerca. 

Ehempel

Douanewaarde di un auto: Afl. 33.000

Departamento di Aduana lo cobra 4% di BBO/BAVP y 3% di BAZV (total 7%).

BBO/BAVP 4%          Afl. 1.320
BAZV 3%                  Afl.    990

Total 7%                   Afl. 2.310 → Esaki ta e suma di BBO na frontera cu e importador ta paga na aduana.

Coreccion di douanewaarde

Si acaso despues resulta cu aduana mester haci coreccion di e douanewaarde, esaki lo tin consecuencia tambe pa e cobransa di BBO na frontera. Por ehempel, si e douanewaarde mester tawata mas halto, aduana lo haci coreccion y cobra e extra invoerrechten y extra BBO na frontera. 

Riba e website di Departamento di Aduana, www.douane.aw, por haya mas informacion.
Transferencia di data

Departamento di Aduana ta registra e pagonan di BBO paga na frontera por medio di e sistema ASYCUDAWorld y lo manda e datonan pa Departamento di Impuesto. E sistemanan digital di Departamento di Aduana y Departamento di Impuesto a wordo configura pa e transferencia di data por sosode automaticamente teniendo cuenta cu normanan di seguridad. Di e forma aki lo procesa e datonan mesora tambe den e declaracionnan di BBO di e comerciantenan. Pa e motibo aki ta sumamente importante pa un importador, specialmente comerciante, duna e persoonsnummer corecto na su broker. Si e persoonsnumer ta incorecto, e comerciante no lo mira e datonan den su declaracion di BBO. 

Comerciantenan ta haci declaracion di BBO

Comerciantenan cu ta bende producto of servicio den cuadro di e actividadnan comercial di nan empresa, tin e deber di haci declaracion di BBO tur luna na Departamento di Impuesto. Esaki ta inclui e comerciantenan cu nan actividadnan di empresa tin dispensacion di BBO riba e volumen di benta (vrijgestelde omzet).

E comerciantenan chikito cu a meld pa wordo registra pa BBO, tambe tin e deber di haci declaracion. 

Entrega declaracion di BBO

Entregamento di e declaracion di BBO ta sosode online via e portal “BO impuesto”, yama tambe “BOi”.  

Registra pa BOi

Comerciantenan mester ta usuario di e portal "BO impuesto" pa por log in. Si un comerciante no ta registra pa BOi, e mester meld pa wordo registra. Por meld door di haci un cita. E cita ta sosode via telefon y pa esaki ta importante pa e comerciante tin su persoonsnummer y "Username" na man. 

Pa mas informacion tocante e portal "BO impuesto", por yama 522 7437 of manda un mail na boi@impuesto.aw. 

Na ki momento mester entrega e declaracion di BBO?

Mester entrega declaracion di BBO tur luna entre fecha 1 y 15 di luna. Dia 15 ta e fecha final. Si e fecha final ta cay den fin di siman of riba un dia liber, esaki lo bira e siguiente dia di trabou. 

E declaracionnan di BBO lo ta visibel den e portal “BO impuesto” riba dia 2 di cada luna. 

Excepcion
E declaracion di augustus 2023 lo ta visibel den e portal desde dia 4 di september 2023. 
Deduccion di BBO paga na frontera

E derecho di deduccion di BBO paga na frontera ta conta unicamente pa e comerciantenan cu tin e deber di haci declaracion di BBO tur luna. E comerciantenan por deduci (“trek af”) e BBO cu nan a paga na frontera, pero solamente ora ta trata di importacion di productonan comercial of “handelsgoederen”. Esaki ta algo nobo den e ley di BBO. 

BBO paga na frontera riba productonan no-comercial no ta deducibel den e declaracion di BBO fin di luna.

Kico ta productonan comercial?

Productonan comercial of handelsgoederen ta productonan cu ta wordo importa cu e meta pa wordo bendi. Pues, si un comerciante a importa producto pa propio uzo den su empresa, e no por deduci e BBO cu el a paga na frontera riba e producto ey.

Ehempel 1

Empresa X ta importa un truck pa por yud’e cu carga di su mercancia. E truck aki ta pa propio uzo di e empresa y no ta destina pa wordo bendi na e clientenan di empresa X. E BBO cu empresa X a paga na frontera no ta deducibel. 

Fecha di pago na aduana ta importante

E fecha di pago di BBO haci na aduana ta determinante pa e momento cu ta aplica e deduccion. 

Ehempel 2

Empresa Y a importa computer pa bende na cliente den luna di september y a paga BBO na frontera den luna di september. 

Empresa Y ta deduci e BBO paga na frontera riba e computernan den e declaracion di BBO di september. 

Mester remarca cu si un comerciante a importa producto den luna di augustus y su broker a paga aduana den luna di september, e comerciante ey lo mira e datonan di BBO paga na frontera den su declaracion di BBO di september.

Deduccion di BBO paga na frontera no ta mara na benta di producto

Deduccion di BBO paga na frontera no ta mara na benta di e producto specifico cu a wordo importa. Un comerciante no tin mester di warda te ora e bende e producto specifico cu e la importa pa por deduci e suma di BBO paga na frontera.  

Ehempel 3

Empresa ABX ta bende celular y computer. Durante luna di augustus el a importa computer y a paga BBO na frontera. Sinembargo, den luna di augustus Empresa ABX no a logra bende ningun di e computernan cu el a importa den augustus.  

Aunke Empresa ABX no a bende su computernan, e tin derecho di deduci e BBO cu el a paga na frontera ora e haci su declaracion di BBO di augustus. 

Un comerciante por deduci e BBO cu el a paga na frontera den e declaracion di e mesun luna cu el a haci pago na aduana. 

Registra compania

Comerciantenan cu no ta registra na Departamento di Impuesto mester registra nan compania pa por deduci e BBO cu nan a paga na frontera. 

Pa registra compania, mester uza e formulario digital specialmente pa esaki. E formulario aki pronto lo ta disponibel via impuesto.aw. 

Deduccion pa comerciante chikito

Comerciantenan chikito en principio no tin derecho di deduccion di e BBO cu nan a paga na frontera. Sinembargo, gobierno a introduci un maneho beneficioso pa e comerciantenan aki, cu ta permiti nan pa registra nan mes boluntariamente pa BBO y asina haya tambe e derecho di deduccion di BBO paga na frontera. 

Un comerciante chikito cu a pidi pa wordo registra pa BBO, pero despues ta desea di stop di declara y paga BBO, no por pidi pa revoca su mes decision. Unabes registra, e comerciante no por bay bek na su status anterior. E ta keda registra pa BBO.

Mas informacion pa comerciante chikito

Deduccion pa persona priva

Personanan priva no ta haci declaracion di BBO, debi cu nan no ta comerciante. Pues, e derecho di deduccion di BBO paga na frontera, no ta valido pa nan.
 

Con ta yena e declaracion di BBO?

E video aki ta duna un splicacion con pa yena e declaracion di BBO/BAVP y BAZV relaciona cu e sistema di cobransa di BBO na frontera entrante e luna di augustus 2023.

E video aki ta pa metanan informativo y no por adkiri niun derecho.


Aki ta sigui algun punto di atencion: 

  • E video no ta splica e “Reverse Charge” of “Verleggingsregeling” menciona den seccion 2. Door di esaki a laga e contesta riba “No”. Pero si acaso esaki ta aplicabel pa Bo, please click riba “Yes”.
     
  • Na seccion 5, tin un "Calculation Tool" pa yuda den caso cu a importa productonan comercial y no-comercial den un luna. Click esaki y yena e total di douanewaarde di e productonan comercial y e sistema automaticamente ta calcula e suma di BBO/BAVP y BAZV. E sumanan aki ta forma e deduccion total di e BBO/BAVP/BAZV cu Bo a paga na frontera. Copy/paste e sumanan pa seccion 5. Si e BBO/BAVP/BAZV cu Bo a paga na frontera ta solamente riba productonan comercial, e ora no ta necesario pa uza e “Calculation Tool”. Den e caso aki e suma deducibel ta igual cu e suma di BBP/BAVP/BAZV paga na frontera.  
     
  • Na seccion 6, e sistema ta pidi pa yena informacion di bo banco. E seccion aki ta visibel unicamente ora bo declaracion ta indica cu Bo tin derecho riba restitucion di BBO/BAVP/BAZV. Solamente e administrador (admin) di e account por yena e datonan di banco. 
Restitucion di BBO paga na frontera

Por sosode cu un comerciante a importa productonan comercial, pero no a logra bende su productonan of no a bende suficiente den un luna. Esaki por causa cu e suma di BBO paga na frontera ta resulta mas halto cu e volumen di benta (omzet) di luna. Den e caso aki e comerciante ta haya restitucion di BBO. 

Ehempel declaracion di augustus

Volumen di benta di augustus: Afl. 800
BBO paga na frontera den luna di augustus riba productonan comercial : Afl. 250

Den e declaracion ta yena:

Vrijgestelde omzet            0,00
Belaste omzet               800,00

BBO/BAVP/BAZV                                       56,00 (7% di 800)
Ta deduci BBO handelsgoederen              250,00 -/- (paga na frontera )
Teruggaaf of te verrekenen                        194,00 (pa haya bek)                     

Den e ehempel aki e comerciante tin derecho di ricibi e suma di Afl. 194 bek. Pa esaki e lo ricibi un “Teruggaafbeschikking” (via post) di Inspector di impuesto. 

Proceso di restitucion ta sosode conforme ley

Mester remarca cu e proceso di restitucion di BBO paga na frontera of cualkier otro tipo di impuesto ta sosode conforme nos leynan. Si acaso un comerciante tin debe di impuesto, Ontvanger lo desconta e suma di restitucion for di e debe. Si resta, e suma lo wordo transferi automaticamente pa e cuenta di banco di e comerciante. Si no tin debe, e comerciante ta ricibi ful e suma di e BBO cu el a paga na frontera.

Control y boet

E team di control di Departamento di Impuesto tin autorisacion a base di ley pa haci control di buki y nan lo actua ora ta necesario, di acuerdo cu ley. 

Ehempelnan
  • Si e prijs di producto riba reki no ta igual cu e prijs cu cliente ta paga na caha, e comerciante ta actuando contra articulo 9b di e ley di BBO. E comerciante aki ta core risico di haya un boet di maximo Afl. 10.000. 
  • Ta controla tambe si loke e comerciante a paga na BBO tur luna, ta cuadra cu e volumen di benta (omzet) cu su empresa a genera.

Ta bon pa clarifica cu un comerciante ta liber pa stipula prijs di su productonan. Si algo no ta cuadra cu e prijs, Departamento di Asunto Economico ta autorisa pa atende cu esaki.

Obhecion di BBO

Riba BBO paga na frontera no ta posibel pa entrega obhecion na Departamento di Impuesto. Como cu e base di cobransa ta e douanewaarde, un comerciante lo mester entrega su obhecion na Departamento di Aduana, si e no ta di acuerdo cu e douanewaarde. 

Ora ta trata e declaracion mensual di BBO, un comerciante por entrega un obhecion contra su mesun declaracion na Departamento di Impuesto.

Ora ta trata di un “Teruggaafbeschikking”, no ta posibel pa un comerciante bay den obhecion of apelacion.  

BBO ta deducibel como gasto di operacion

Tur pago di BBO ta gasto di operacion (bedrijfskosten) di empresa. No a bin cambio di ley riba e parti aki. Pues, e BBO cu un comerciante a paga durante aña, sea na frontera of ora el a bende su producto of servicio, ta keda deducibel como gastonan di operacion (bedrijfskosten) di e compania. 
BBO paga na frontera riba productonan no-comercial no ta deducibel den e declaracion di BBO fin di luna, pero si ta deducibel como gasto di operacion.

Na momento cu un comerciante traha e cuenta anual (jaarrekening) di su compania, e ta inclui e gastonan di BBO. Esakinan ta reduci su ganashi total. E lo paga menos inkomstenbelasting of winstbelasting.