A termina e prome tanda di sesionnan cu gremio
![](https://cuatro.sim-cdn.nl/impuesto/uploads/styles/large_5x1_2560x512/media/_dsc2342.jpg?h=9b0b2f2d&cb=XG6E31G7)
ORANJESTAD – Segun e mandato oficial di Gobierno di Aruba y e acuerdonan bilateral cu Hulanda, den luna di februari y maart 2022, Departamento di Impuesto a tene un serie di “Stakeholders Meeting” na unda a tene dialogo cu gremio referente Reforma Fiscal 2023. Durante e diferente encuentronan a presenta e situacion financiero actual, e structura legal acorda segun “landspakket” y e propuesta di reforma di leynan di impuesto cu no solamente ta inclui introduccion di un sistema di BTW, pero tambe reduccion y compensacion di impuestonan directo manera inkomstenbelasting, loonbelasting y winstbelasting.
Participacion cu base amplio
Departamento di Impuesto ta hopi satisfecho cu e participacion di un base amplio di gremio di diferente sector priva y publico. E resultado ta un contribucion amplio y obhetivo na e propuesta di reforma fiscal presenta. Aki a tuma nota di diferente preocupacion, informacion y ideanan valioso cu a wordo comparti verbalmente y por escrito. Esakinan a wordo inventarisa y presenta na Gobierno di Aruba pa asina por continua cu e proceso di evaluacion di e concepto di Reforma Fiscal 2023.
Mas dialogo cu gremionan
A tuma nota cu gremionan ta apoya e idea di un sistema nobo di impuesto pa asina tin mas eficiencia y balansa den cobransa di impuesto cu ta genera entrada pa caha di gobierno y/of pais. Nan a demostra tambe preocupacion pa cu maneho y reduccion di e gastonan gubernamental y e impacto di e introduccion di un sistema di BTW. Pa guia e dialogo riba e terenonan aki lo tin encuentronan na fin di maart y comienso di april 2022 den forma di “breakout sessions”, unda tur participante por contribui activamente na e concepto final di e reforma fiscal.
Departamento di Impuesto ta satisfecho cu e intercambio fructifero cu gremionan y cu inicio di e trayecto inclusivo di e reformanan fiscal y lo comparti esaki cu Gobierno di Aruba cu lo tuma e decision final. E ekipo multidisciplinario di profesionalnan riba tereno di impuesto ta trahando pa mas cu un aña caba cu Gobierno di Aruba y Hulanda pa por a yega na e acuerdonan di reforma cu lo yuda determina e rumbo di bienestar general di nos nacion y futuro generacionnan.
Gerencia di Departamento di Impuesto
21 di maart 2022