Cumplimento cu pago di loonbelasting y BBO/BAVP/BAZV mester mehora
E debe total di periodo januari te cu juni 2022 ta 34.5 miyon florin
ORANJESTAD – Departamento di Impuesto ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal. Responsabilidad fiscal ta encera entregamento di declaracion y pago corespondiente na tempo. E cumplimento of “compliance” pa cu pago di impuesto ta un parti importante di un bon comportacion fiscal.
Cumplimento
Segun e cifranan, e empresanan cu a entrega nan declaracion di loonbelasting y BBO/BAVP/BAZV di e periodo januari te cu juni di aña 2022, no a paga e suma di impuesto cu ta coresponde cu nan propio declaracion y/of no a paga na tempo. Consecuentemente Departamento di Impuesto a saca cobransanan adicional cu boet pa incumplimento di pago.
Ta importante pa menciona cu den e cifranan di loonbelasting ta inclui tambe e primanan di AOV/AWW y AZV y ta trata sumanan cu e dunado di trabao a retene for di su empleadonan y no a paga esaki na Departamento di Impuesto. Pues ta trata di sumanan di impuesto y primanan social cu ta coresponde cu e responsabilidad di pago di e empleado cu no a wordo paga debidamente door di e dunado di trabao.
Pago di BBO/BAVP/BAZV ta coresponde cu e sumanan di ganashi di un empresa caminda cu e 6% di impuesto cu ta aplicabel no a wordo paga na Departamento di Impuesto.
Aki ta sigui un bista di e incumplimento of “non-compliance” pa loke ta trata pago di impuesto conforme propio declaracion.
| Cantidad di contribuyente cu a ricibi un cobransa adicional | 1.237 | |
| Cantidad di cobransa adicional | 6.986 | |
| Suma total di cobransa adicional | Afl. 18.8 miyon |
| Cantidad di contribuyente cu a ricibi un cobransa adicional | 1.489 | |
| Cantidad di cobransa adicional | 6.558 | |
| Suma total di cobransa adicional | Afl. 15.7 miyon |
Ta importante pa menciona cu si un contribuyente no cumpli cu pago di impuesto tin consecuencianan indesea di cobransanan adicional, boetnan halto y sumanan di interes cu ta resulta den un suma total mas halto pa paga sin cu ta necesario. Esaki por hinca e comerciante y/of empresa den un situacion financiero dificil pa sali for di dje. P’esey keda sin haci pago di impuesto no ta un opcion.
Cumplimento cu declaracion y pago di impuesto ta e responsabilidad di e contribuyente y no di Departamento di Impuesto. Sea e ta un persona individual, dunado di trabao, comerciante chikito y/of compania grandi, e responsabilidad fiscal ta den su man.
Mester registra e empresa
Tur comerciante mester haci declaracion mensual den forma digital via e portal “BO impuesto” (BOi). E comerciantenan cu ainda no a registra como usuario, mester haci un cita mas pronto posibel. Por haci e cita via www.impuesto.aw ► Afspraak maken y klik riba e link “Registreren voor het online portaal “BO impuesto” (BOi). Pa mas informacion tocante e portal por yama 522 7437 of mail na boi@impuesto.aw.
E comerciantenan cu no ta haciendo declaracion di impuesto riba entrada (inkomstenbelasting of winstbelasting), por tuma contacto cu Departamento di Impuesto na 522 7424 pa mas guia.
Facilitando y informando e contribuyentenan
Departamento di Impuesto t'ey pa facilita e contribuyente pa por cumpli cu su debernan fiscal pa medio di sistemanan digital pa por cumpli cu e declaracionnan mensual manera declaracion di BBO/BAVP y BAZV loonbelasting y e primanan AOV/AWW y AZV. Alabes e departamento ta brinda informacion importante tocante e fechanan final pa medio di su website www.impuesto.aw, su pagina di FaceBook y tambe comunicadonan di prensa. Asina Departamento di Impuesto ta purba clarifica cualkier duda cerca e contribuyente y atende cu cualkier pregunta tocante pago di impuesto.
Finalmente Departamento di Impuesto kier gradici tur comerciante cu si a cumpli debidamente cu e pagonan di loonbelasting, primanan di AOV/AWW/AZV y BBO/BAVP/BAZV y den mesun rosea urgi e comerciantenan cu no ta cumpli cu nan pago di impuesto pa atende cu nan responsabilidad fiscal. Nos tur mester demostra di ta consciente di e importancia di cumpli cu nos debernan di impuesto y asina contribui na bienestar di nos tur cu ta biba y traha riba nos dushi isla Aruba.
Gerencia di Departamento di Impuesto
13 di september 2022